Pekini mund të përballet me një valë “armiqësie” në përfundim të pandemisë që mund të kulmoje në “një përballje të armatosur” me Shtetet e Bashkuara të Amerikës.

Të paktën kështu thuhet në një raport të brendshëm nga Sigurimi i Shtetit në Kinë, i përgatitur nga Instituti Kinez për Marrëdhënie Ndërkombëtare Bashkëkohore, detajet e të cilit u publikuan nga agjencia Reuters.

Reuters thekson se nuk e kanë parë raportin në fjalë, por u është përshkruar nga njerëz të cilët kanë njohuri direkte rreth këtyre zbulimeve. Në raport thuhet gjithashtu se kriza mes dy vendeve mund të jetë e krahasueshme me reagimin e botës në ngjarjet e dhunshme të vitit 1989 në sheshin Tiananmen.

Po ashtu, Qendra Kineze e studimit paralajmëron se ofensiva ndaj Pekinit kërcënon që të komprometojë marrëdhëniet me SHBA-të ndërsa sugjeron se qeveria kineze duhet të përgatitet për skenarin më të keq në të cilin përfshihet edhe mundësia e një përplasjeje ushtarake mes dy fuqive globale. Kina gjithnjë e më shumë po vihet në shënjestër të Perëndimit pasi akuzohet se ka reaguar vonë apo edhe ka fshehur nisjen e pandemisë së koronavirusit.

Ditët e fundit, presidenti amerikan Donald Trump, duke u përballur me një fushatë më të vështirë rizgjedhjeje pasi koronavirusi ka marrë dhjetëra mijëra jetë amerikanësh dhe shkatërroi ekonominë e SHBA-ve, ka shtuar kritikat e bëra në drejtim të Pekinit duke paralajmëruar tarifa të reja për Kinën.

Administrata e tij, ndërkohë, po shqyrton masat “hakmarrëse” kundër Kinës për pandeminë, thanë zyrtarët.

Në Pekin besohet gjerësisht se Shtetet e Bashkuara dëshirojnë që të frenojnë një Kinë në rritje, e cila është bërë më e sigurt globalisht ndërsa ekonomia e saj është rritur.